மருத்துவமும், மூட நம்பிக்கையும்...

படிக்காதவர், படித்தவர், ஏழை, பணக்காரர் என்ற பாகுபாடு இன்றி மூட நம்பிக்கைகளுக்கு ஆட்படுவோர் நம் நாட்டில் அதிகம். அப்படி அவர்கள் செய்வதெல்லாம் சரியா? என்றால் இல்லை என்பதுதான் மருத்துவ அறிஞர்களின் பதில்! அந்த மாதிரியான மூட நம்பிக்கைகளை பார்ப்போம்,

* மஞ்சள் காமாலை போன்ற நோய்களுக்கு உரிய மருத்துவம் பார்க்காமல் சூடு வைப்பது. வலிப்பு நோய்களுக்கு கூர்மையான இரும்பு ஆயுதங்களை கையில் கொடுப்பது.

* குடலை சுத்தம் செய்வதாக நினைத்துக் கொண்டு, அடிக்கடி பேதி மருந்து, விளக்கெண்ணை போன்றவற்றைக் குழந்தைகளுக்கு தருவதால், குடல் நலக் கேடுகள் ஏற்பட்டு, உடல் நலத்தை பாதிக்கும்.

* உடல் சூடு ஏற்பட்டிருப்பதாக நினைத்துக் கொண்டு, சூட்டினைத் தணிப்பதற்காக, எண்ணை தேய்த்து குளித்தல், மூக்கிலும், காதிலும் மற்றும் கண்ணிலும் எண்ணையை விடுதல் போன்றவை கூடாது.

* முட்டை, பயத்த மாவு ஆகிய தேவையற்ற பொருட்களைக் கொண்டு, உடம்பினில் தேய்த்துக் குளித்தால் ஒவ்வாமையினால் தோலில் அரிப்பு, தடிப்பு தோன்றும்.

* கண் நோய்க்கு, முலைப் பால், இலைச்சாறு போன்றவற்றை விடுவதால் கண்பார்வை பாதிக்கும்.

* குடல் புழுக்களை அகற்றுவதற்காக, வேப்பெண்ணையைக் குழந்தைக்கு அளிப்பதால், நுரையீரலில் எண்ணை இறங்குவதோடு, குருதி மூலமாக மூளைக்குச் சென்று மூளையை பாதிக்கும்.

* குழந்தைகளுக்கு அக்கி எனப்படும் வைரஸ் கிருமி நோயினால், தோலில் கொப்பளங்கள் உண்டாகிடும் போது, செம்மண் கொண்டு எழுதுவதும், கரும்புள்ளி- செம்புள்ளிகளை பதிப்பதும் கூடவே கூடாது.